Method:
Maak ’n vuur met genoeg kole vir braai. Plaas ’n rooster ongeveer 30 cm bo die kole. Hou ’n paar stokke (gestroopte olyftakke werk baie goed) byderhand.
- Smoor: Sit die smoor, tamatiepasta, knoffel, rissies, indien gebruik, en suiker saam in ’n kastrolletjie. Verhit tot die mengsel begin kook. Verlaag die hitte en laat 10 min. prut. Geur na smaak met die sout en peper. Hou eenkant.
- Stokbrood: Knie die deeg liggies af en knyp 8-10 bolle af. Rol elke bol deeg in ’n lang slangetjie. Druk die een punt van die slangetjie aan die punt van ’n stok vas en draai die deeg om die stok sonder om openings te los. Herhaal met die res van die deeg en stokke.
- Strooi ’n bietjie meel oor die deeg en pak die deegstokke op die rooster; draai gereeld om om te verseker dat die deeg oraloor braai. Dit sal ongeveer 15 min. neem tot die deeg gaar is. Die deegstokke hoef nie noodwendig op die rooster gepak te word nie; dit kan oor die kole gehou word tot gaar.
- Vir voorsit: Trek die brood liggies van die stokke af. Dit behoort maklik los te kom wanneer die brode heeltemal gaar is. Breek die brode versigtig oop en stop met die boerewors en smoor, of sit net so voor saam met botter.
