Ricotta-sjokolademousse

My ma se suster Janette maak ’n hemelse sjokolademousse van ricotta wat nie so ryk soos gewoonlik isnie, maar ook nou nie so dat jy dit sal agterkom nie: Klits hiervoor 4 eiergele en 100 ml (80 g) strooisuiker saam tot baie dik en lig. Klop hierby 250 g ricotta en ’n eetlepel (15 ml) kitskoffie wat opgelos is in 2 eetlepels (30 ml) kookwater. Meng dan 200 g gesmelte donkersjokolade en so 1/3 tot ½ koppie (90-125 ml) koffielikeur by. As jy nie het nie, kan jy ook Van der Hum-likeur gebruik (of ’n ander een na jou smaak). Klop ’n koppie (250 ml) room en vou dit in die sjokolade-kaasmengsel in sodat dit sulke mooi roomen- sjokoladewarrels maak. Skep in ’n bak en verkoel ’n paar uur of oornag. Genoeg vir agt mense.